Friday, May 10, 2013

அந்த ஐந்து நிமிடம்!


அது
விரக்தி சப்பித்துப்பிய
பேய்கள் அற்ற சுடுகாடு!

காற்சட்டையும் வெள்ளை
மேற்சட்டையும் ஓட்டை
முதுகு விரிய நடந்தவன்
நிமிர்த்தி வைத்த மண்புழுவாய்
ஒட்டி ஒல்லியாய்...

மிருகக்காட்சி சாலைக்குள்
இலகுவாய் புகுந்த எனக்கு
இந்த
சிறைச்சாலைக்குள்
அத்தனை தடுப்புக்கள்..

ஐந்து ஆண்டுகள்
தன்னோடு மட்டும்
பேசிக்கொள்ளும்
அவனோடு பேச
'ஐந்தே நிமிடம்'!
அங்கு,
செத்துப்போன
மனசாட்சியும் மனிதாபிமானமும்
எனக்கு
கொடுத்த சுதந்திரம்!

'நண்பா' தவிர
என்வாயில் வார்த்தைகள் இல்லை.
'ம்ம்ம்' தவிர
அவன்பேச சக்தியும் இல்லை.
எமக்கிடையிலிருந்த
கம்பி வலையில்
சிக்கி சீழ் வடித்துக்கொண்டிருந்தது 
எம் நட்பு!

நான்கு நிமிடம்!
கண்நீரைத்தவிர
அவனிடம் - நான்
எதையும் எதிர்பார்த்திருக்கக் கூடாது!
ஆசையாய்
'நண்பா' என ஒரு வார்த்தைகூட...

அதையும்
கண்ணீராலேயே கழுவி
அவன்
கைகளை பற்றியிருந்த
எனது கைகளில்
சொட்டு சொட்டாய் கொட்டிவிட்டான்!

ஐந்து நிமிடம்!
விலக மனம் இல்லை
அகலவும் முடியவில்லை..
காவலாளி போ சொல்லும்வரை
அவன்
கண்ணீரை நிறுத்த முடியவில்லை.
இறுதியில்
ஒரே வார்த்தை!
"நண்பா,
என்னை
துரத்தி துரத்தி
இயக்கத்திற்கு பிடித்தாரே
அந்த அண்ணர் - அவரிடம்
என்னை வெளியில் எடுக்க
உதவி கேட்டுப்பார்..
அவரால் முடியும்..!"


No comments:

Popular Posts