Thursday, July 7, 2011

ஓ மங்கையே,

ஓ மங்கையே,
நம்
போராட்ட வரலாறு
கசக்கி வீசப்பட்ட - உன்
பிணத்தோடேயே முடிந்திடட்டும்.

உன் ஆடை அவிழ்கையில்
அவர்கள் சுதந்திரம்
சிரித்தது.
உன் துணி விலக்கி - உன்
பனித்தேகத்தில்
பன்றிகள் புரண்டபோது
ஈழப்போராட்டம்
தலைகுனித்து நின்றது.

ஐயோ பாவம்,
யாரோ
வைத்துப்போன தீயில்
இறுதியாக தீர்ந்தது
உனது தேகம்.

உனது
பிணத்தைக் கூட
விடாமல் புணர்ந்தவன்
பிரமாதம் என்றான்.

காம நரிகள் - உன்
இடைகளில் ஏற,
காட்டெருமைகள் சில - உன்
கைகளை பற்ற,
அக்கரும அரக்கர்கள் - உன்
அங்கங்களை அமுக்க,
துட்டகைமுனுக்கள் - உன்னை
கதற கதற கற்பழித்தனர்.

நீ இட்ட ஓலம்
மேகத்தை கலைக்க,
அவர்கள் ஏற்றிய
சுதந்திரக்கொடி மட்டும் - மானம்விட்டு
பறந்தது வானில்.

உன்னை புதைத்த
இடத்தில் அவர்கள்
மகாபோதி நட்டனர்.
பின்னர் அதற்கு
கீழே புத்தர்
சிலையும் வைத்தனர்.

இப்போ அது -
அவர்களுக்கோ கடவுள் வாழும் கோவில்
எங்களுக்கோ நீ வாழும் கல்லறை.

1 comment:

Mayuran said...

வாசித்து முடித்தவுடன் இதயத்தில் ஒரு வலி .....

Popular Posts